فالسنوات القليلة الماضية شفنا بزاف دالناس الي دارو مبادرات باش يساعدوا الاخوان . سواء من خلال صفحات او البروفايلات الخاصة ديالهم. و كاينتهي بهم الامر ب بوسط طويل عريض كايقول انه ندم علاش شارك المعلومة مع الناس لاسباب مختلفة
اول شيء خاص نعرفو هو ان الاحتكار كاين فكاع البلايص .و فكرة ان الاحتكار كاين فقط فالمغرب او الدول العربية ماشي صحيحة . غير هو الاحتكار فهاد الدول كايكون اكثر و هادشي راجع لبزاف دالاسباب
اول سبب هو العقلية. الانسان المغربي او العربي عندو عقلية القوالب و كايضن ان اتباع القوانين امر غير صائب و مافيه ربح. و هادشي كايخلي الشخص الي باغي يشارك شي معلومة كايشوف بالي هاد الناس غير غادي يخربوها على كولشي
ثاني شيء قلت الاحترام . فمثلا كادير مجهودك باش تساعد مجموعة دالناس و فاللحضة الي كاتأخر فالاجابة كايوصلك رسائل من قبيل ( ا جاوبنا #$#&$) . و هادشي طبعا كايخليك تفضل التركيز فالعمل ديالك بدل مساعدة الناس و نشر المعلومة
ثالثا. الشخص الي كايوصلك المعلومة هو واحد الانسان الي كان سهران الوقت الي انت كنتي ناعس . و كان خاشي عينيه و محمق راصو الوقت الي كنتي مسركل فالقهاوي و ناشط مع راسك. و انه يعطيك المعلومة بعدما شقى عليها ( و طبعا هو ماشي مجبر). فهو امر يدعو للتقدير
مما سبق اذا بغينا ندفعوا ناس اكثر انهم يشاركونا المعلومة
اول شيء نبينوا اننا فعلا قد المسؤولية و مستاعدين ناخدو الامور بجدية و مانخربوش المجال
ثانيا و ثالثا . نحتارموا الاشخاص و نشكروهم على المجهود ديالهم
من جهة اخرى خاص نعرفو ان العمل في الانترنت كايتحول بسرعة كبيرة جدا و المعلومات الي كانو خدامين البارح . اليوم مابقاوش صالحين . و احنا دائما في حاجة لناس يوصلو لينا المعلومات. بالتالي خاص نغيرو العقلية باش نقدرو نواكبوا هاد التغير
دمتم سالمين
